samsara

「今天少年人，他朝老年人，不知有沒有改變…」

幾星期前，我做事間雜貨鋪個 marketing manager 隨興提起霑叔。佢話始終覺得霑叔咁多年來填o既詞一定係有個章法o既…

『我番屋企聽多兩次「輪流轉」然後話你知。』

david 心諗…

佛經。

報章隨口話霑叔「晚年信佛」。david 覺得未必；皆因廿幾年前已經有跡可尋。《上海灘》脫胎自楊慎填o既《臨江仙》：

「滾滾長江東逝水，浪花掏盡英雄。事非成敗轉頭空…」

頗有出塵之意；到o左《上海灘龍虎鬥》話「忘掉愛癡怨恨」，都幾明白係講緊「貪、嗔、癡」三大戒咯。

至於「輪流轉」，嘻…

言歸正轉；講起與佛有緣，呢篇o野係整o黎送畀我老死韻儀o既。前排當 david 仔仲等緊雙糧萬事都得個諗字個陣，韻儀話笛就笛，走左去尼泊爾索柏喇嘛座下間寺院度坐左一個月禪。

佢番o黎後畀本功課簿我睇；係源自阿底峽尊者《菩提道燈》o既法寶。小弟掀開八卦o下，韻儀二話不說就隨手指住個「輪迴」；就係上面幅公仔。

呢個「生死輪」o既中心係鴿、豬、同蛇；分別代表霑叔時不時提起
o既「愛、癡、怨恨」。貪嗔癡三隻小動物你追我，我咬你，團團轉就轉o左個大鑊出o黎…

釋尊話過，佢成佛之後無論直接或間接講o既所有開示，絕無例外係教人點可以唔駛再響「天、人、阿修羅、地獄、餓鬼、畜牲」六道入邊一世復一世咁夢遊。世尊係如語者、實語者、不妄語者；從不嘩眾取寵。可見呢句說話其實講得幾重。

但係 david 呢個門外漢之所見，十個自謂「佛教徒」（包括和尚），似乎有九個對出火宅走投冇乜興趣；都唔知幾鍾意紅塵十方。學法只係想睇o下點樣可以響得失榮辱聚散入面過得舒服少少（GOD，住好D？）。一頭話學「無常、苦、無實我」，轉頭夾錢起個健力士世界大銅佛搞乜鬼？所以見到韻儀乜o野發財密咒、禱文都唔理，一手指住個輪迴；小衲確實覺得有 D 奇…

小衲抬頭望望；弊傢伙，好似見到韻儀頭頂隱隱有個光圈添。