中招

個 blog 兩個月冇更新，係因為前排發生o左 D 事，david 唔痛快o左一陣。冇耐諗通o左「若事還可救，云何不歡喜？若已不濟事，不樂有何益？」於是就結夏安居，專心搞o下漫畫（三十期嘍），個 blog 本來決定初秋先再理。

唏，點知都係要俾阿修羅揪番出o黎。

這個串連遊戲嘛…前排睇到，覺得不以為然。要自揭所謂「怪癖」… 嘿，抖得出o黎o既，睇白都唔 fetish、唔「怪」得去邊。唔通喜愛 PVC 易服、震蛋或男人都公告天下？況且 Sidekick 話齋，俺係關人隱士，冇乜同 D 自詡 “blogger”o既街坊來往。若果有人點俺出o黎，俺個 response 相信同太公唔會差好遠。

不過呢次呢，OK 啦，推薦三本好書，比之前個有意思得多。況且係阿修羅兄叫到…

講起阿修羅，我倆素未謀面；但仁兄佢對藏傳佛法 — 特別係甯瑪派「大圓滿」、「大中觀」所知甚深，所以小衲耐不耐會向佢請益（用o黎諗漫畫）。不過，阿修羅兄 D 回覆門檻勁高，唔係個個小衲都抵受得住。睇睇：

般若智慧能斷煩惱，如「金剛」能斷萬物。然般若智能被斷乎？曰：能。唯斷般若智者亦般若智也。

般若經有大般若(十萬偈)、中般若(二萬二千偈)、小般若(四仟偈)。中般若含攝大般若之精要，小般若則為中般若之攝集(見《大智度論》)。小般若之攝集更兼具堅利之性者，《金剛經》也。

佩服。

言歸正轉，三本俺最喜歡o既書。唔……

Hermann Hesse - Siddhartha

Hermann Hesse 大膽咁將釋尊同釋達多太子分拆成兩個人，然後用優美絕倫o既 prose — david D prose 都係同大哥老笠o既 — 將王子由富貴（皇宮享福）變閉翳（苦行）又變富貴（富商）又變閉翳（船夫）然後睇穿摩羅面紗成佛o既古仔娓娓道來。呢本著作既奧妙之處係：逢五年多o左人生經驗，佢又變o左第本書；再過五年再多 D 人生經驗，佢又再變第本書… 我o個本揭到條書脊散哂；抵睇。

Ernest Hemingway - The Old Man and the Sea

海明威寫《老人與海》用o既英文簡約到接近禪家妙境。示範o左用文字時愈克制唔濫情，個故事就愈見深刻。david 老友 Colan 話：睇見書中個老人家拼盡所有都結果係輸時，就明白「投哂降」係乜感覺…

村上春樹 - 1973 年的彈珠玩具

愉快o既嘻笑同銷費下面，係一個淡淡然但好傷感既古仔；好似一舊雨水色o既水晶。冇再版好耐咯。如果你好彩仲搵得到o既話，算執到好o野嘍…

呼，D hyperlink 打到手軟。留意呢三本書冇本過百五頁，可以想像 david 幾咁怕睇書…

Ta da！又到揀下家o既時間；答案係冇o既。唔係怕人炳，確實係乜人都唔識。

Voila! OK? 各位街坊，下不違例。再有 D 咁o既串連，唔該唔好搵我咯喎。